世界綠色組織

余遠騁搞非一般環團
失落副局長位

【明報專訊】環保界最近又添新力軍，名為「世界綠色組織」，由前世界自然基金會香港分會氣候項目主管余遠騁（William），伙拍環保企業家、球誼環保集團行政總裁汪振富創辦。William今年中應徵環境局副局長而為人認識，雖然最後個位落陸恭蕙手上，William仍可繼續以民間團體身分，監察政府施政。

主要關注弱勢社群

William噚日同傳媒茶敘，介紹世界綠色組織大計，佢話呢個組織唔單止關注環境污染、保育等問題，亦關心因環境引發社會問題，尤其弱勢社群生活需要，所以組織定位同一般環團唔同，既研究政策，亦推動地區活動，改變市民生活習慣，頭炮係下月初協助基層舉辦對抗加電費活動。

林超英陳智思做顧問

世界綠色組織目標係打破「環保、經濟、民生」各自為政局面，為實現理想，梗唔少得幕後顧問團隊，猛人包括前天文台長林超英、行會成員陳智思、前環諮會主席林健枝、美國綠色建築標準LEED創辦人Robert Watson等。對於名單之入面有重量級「梁粉」林超英，William話唔怕組織被定型，仲講笑咁話如果佢係「梁粉」，早就做副局長，仲使另起爐灶？