Friday, December 16, 2011

工黨周日出世

工黨黨徽一撇綠倡環保
周日出世 黨綱逾3萬字

【明報專訊】醞釀多時工黨終於緊禮拜日出世,該黨籌委百般滋味在心頭。據聞一班籌委過去年幾時間中,足足寫3.4萬字黨綱,除主打勞工議題,城市規劃、保育及綠色工業方面都有唔少墨,所以黨徽會有「一撇綠」,代表環保咁話。

工黨約有130名創黨黨員,職工盟屬下新巴、九巴同物業管理工會以及公民起動,都會以團體形式加入。據了解,工黨黨綱會有好大篇幅談及歷史保育同舊區重建等城規議題,中港人口政策亦會獨立成章,全城熱話「地產霸權」走唔甩,文化議題方面搵到本身係公民起動香港當代文化中心主席操刀。

工黨頭炮將會主打下年2月財政預算案,提倡設立股息稅,目標對象係每年錄得超過25萬股息收入人士,另一方面就要求減利得稅,幫輕基層同中產,希望做到財富再分配效果。預料當選成為工黨創黨主席李卓人就話,工黨雖然叫工黨,但唔係只關注基層,「香港中產同基層一樣都係制度受害者,失業就冇保障,其實我係代表全港99%」。

講咁耐,禮拜日成立典禮又有咩搞作呢?據聞選完主席同執委後,佢就會象徵式切蛋糕慶祝。

唔切燒豬免惹遐想

有工黨中人笑言,本來諗住切燒豬,但家陣「豬狼對決」鬧得熱烘烘,怕會惹人遐想喎。工黨成員、港大通識教育部領袖培育課程副主任梁啟智都係日生日,切蛋糕晒啦。

No comments: