「80後文藝青年」

80後轟藝發局只懂派錢

【明報專訊】藝術發展局一直係「派錢」機構，但係噚日有一班藝術工作者，拉隊上藝發局「派錢」。話說一班熱愛文學文藝青年組成「80後文藝青年」，噚日操上藝發局，抗議藝發局只係識得派錢，但係冇為本地藝術界發聲，佢仲印一大疊「金牛」（當然唔係真鈔），大罵藝發局「派錢唔係大晒」。

「無為藝術界發聲 資源太少」

「80後文藝青年」8個成員包括鄧小樺、葉浩麟同埋蔡芷筠噚日一齊操上藝發局辦事處，職員見到佢上門抗議都嚇一跳。佢話，藝發局無法替藝術界發聲，只做撥款，但實情投放本地藝術發展資源太少。佢又話，近年畫家街頭寫生經常被指阻街，亦有唔少Band友或藝術家因工廈改建條例修訂而失去創作基地，但藝發局都無幫佢發聲，大家已經忍無可忍。佢3個已決定報名參選藝發局月中舉行10個藝術範疇代表選舉，但承認勝算好有限。

藝發局回應話，局方一直透過不同資助項目支持本地藝術工作者同藝術團體各類活動，當中亦有非正式場地演出同活動，但對於資源太少批評就無正面回應。