女同學社

性小眾藝術作品展覽
社會越來越關注同志平權議題，同志團體女同學社噚日喺土瓜灣牛棚藝術村，舉行性小眾作品展覽，有數十件陶泥、文字及視覺藝術作品，其中有支持同志運動嘅少女，製作咗一封寄畀教會嘅信，信上畫有同性及異性手拖手，喺彩虹下和睦生活，寫滿基督教對同志嘅惡毒批判句子；作者B女相信只要真心信主，同志仍可上天國。立法會議員何秀蘭及首位出櫃議員陳志全周六會到場參觀支持。

場內又有一封希望寄畀自己情人嘅信，上面寫上二人一起走過的日子，「我記得七一、六四……」另有名為「愛無懼」嘅陶泥作品，表達同志要面對世人排斥及奇異目光，但在雙方家人及朋友支持下了無懼色，強調彩虹終會出現。展覽以「關係」為主題，為期三周，希望各界人士了解不同性傾向人士想法，消除誤解、尊重差異。