富德樓包租婆

爽人物：一樓一藝包租婆　
革命基地靠佢摸

這陣子，位於軒尼詩道的富德樓好紅；七一遊行，標語掛滿大樓外牆（小圖），成為另類景點；上周獨立媒體被惡漢搗亂，其辦公室正設於此。這幢60年代落成、外形平平無奇的舊商廈，原來大有來頭，BBC追訪、成為港府改建工廈為藝術村的計劃藍本。60歲的香港兆基創意書院副校監馮美華，是富德樓包租婆，對於隱世藝術村成為「革命基地」，她有話要說。
記者：呂麗嬋

10年前，喺藝術中心有個論壇，講藝術空間，富德樓大業主係低調文化人，聽完論壇主動聯絡我，話喺富德樓有14個單位，以前做板間房乜嘢都有，𠵱家丟空，問我：『可以點幫啲藝術家？』我有籌辦牛棚藝術村嘅經驗，同佢講，大部份藝術家好窮。平租、適當空間，無為而治就好。

來自民間嘅富德樓藝術村，於是成形。以低價出租單位畀藝術家，500平方呎嘅單位，月租2,000，只及同區市價嘅五分一。入住嘅藝術家，要符合資格，除咗夠窮，仲要有創作計劃。一開始我哋扶佢一把，一旦能夠喺商業社會立足，就終止租約。好好彩，咁多年嚟，冇遇過租霸！

崇尚無為而治

我一直深信，入得嚟嘅創作人，都有團火。就係呢種信任同自由創作嘅氣氛，令富德樓成為示範藝術村。港府之前話改建工廈，都有派人過嚟取經。有人話富德樓嘅創作人，越來越社會性。大廈位處遊行必經之路，七一遊行，不同樓層嘅工作室，喺外牆掛滿標語，成為另類遊行景點。

藝術家關心社會，其實好正常。兩、三年前，一樓嘅指壓中心結業，業主收回。當時，剛好遇上老牌書店曙光大批英文書冇人接管，我建議轉型成為文化書店，又附設茶座。漸漸，成為文化人聚腳嘅空間，加上如獨立媒體一類機構進駐，討論社會議題嘅氣氛，越來越熾熱。

未全職做藝術行政工作前，做咗近廿年公務員，喺培訓處負責培訓中層公務員，體驗到管得太多嘅壞處；簡單如寫一封信，喺政府，都有固定模式，指引多到你唔信。離開公務員體制，協助籌建創意書院，我嘅行政經驗，仍大派用場，牛棚藝術村、富德樓，無為而治，可激發更多火花，信不信由你。