維園之友

民建聯出「黨史」
維園阿伯係成員
【明報專訊】民建聯今年出本新書叫《建港心路——與民建聯的緣與份》，由鍾士元同吳康民幫手寫序，作者係民建聯成員阮紀宏，共有43個會員訪問。受訪者包括蘇錦樑局長、前司長梁愛詩、曾鈺成、程介南等，非常大堆頭。不過呢本書最有趣，係有民建聯基層成員訪問都好好睇，好似原來有個「維園阿伯」係民建聯成員，叫許金池，佢仲大談自己基於「義憤」而第一次到維園鬧民主派。

「維園之友」有400幾人

79歲許金池1993年加入民建聯，佢訪問中澄清，佢唔係「維園阿伯」，而係「維園之友」。佢話自己5代都係香港人，自己冇受人指派到維園攻擊民主派，第一次去維園，係因為當時有民主派議員話一個仙都唔好留畀特區政府，佢覺得言論「很有問題」。許氏仲大爆家維園之友呢個鬆散組織，人數已增至400幾。

劉江華入黨頻「中箭」

另一個Emily覺得有趣章節，係由港同盟走入民建聯立法會議員劉江華，話自己入民建聯即「中箭」。佢話當時加入民建聯，圈內外人都反對，呢反對聲音就係中「箭」。該「箭」無論係「政治箭」定「立場箭」，劉都形容係受傷，感到很痛、很難受。不過，家佢已經到達「視箭非箭」境界，覺得若願意接受同聆聽，咁批評就唔係「箭」。

民建聯話呢本書係一本黨史，唔經唔覺就快20歲，有成「逾2萬會員」。Emily打開記者包，發現除有本新書，仲附有製作精美入會表，唔通民建聯想記者入黨？