消防處職工總會

消防工會理事集體劈炮

【明報專訊】自從上年初消防隊目楊俊傑長沙灣工廠四級大火殉職後，消防處職工總會主席趙善聰對外話，出事原因同裝備不足無關，引起唔少會員不滿，斥責工會未能為同袍爭取權益，一直有聲音要求罷免趙善聰咁講。

會員不滿主席未爭取權益

事件拖拖拉拉，噚日有新進展。Emily得悉，會員噚日同前日工會特別代表大會中，分兩日就對第39屆理事團「不信任動議」進行投票。投票首日，已有三分之二會員投不信任票。唔知理事會係咪見大勢已去，噚日下午，即投票第2日，搵幾個理事出讀份聲明，話第39屆全體15名理事集體辭職，5月會下放權力，之後就無晒影，會員亦再搵唔到班理事。

因為不滿趙主席而去年12月辭職工會前副主席黃國英同Emily講起，話趙主席去年被鬧爆後，一直採取「hea」態度面對餘下任期，減工時、升級試改制等問題不聞不問。雖然大家一直好想趙主席辭職，但一眾理事突然人間蒸發，既無交代點樣過渡，又無留低文件作實，家大家都好頭痕。

Emily噚日搵趙主席問，佢話件事係日常會務，屬於內部問題，唔會回應事件。