《南方都巿報》頒年度公民獎

菜園村民內地響名堂
《南方都巿報》頒年度公民獎

【明報專訊】最近因為刊登一張「空」頭版大相聲名大噪《南方都市報》，上星期日深圳舉辦「深港國際生活大獎」頒獎典禮，呢類由傳媒舉辦頒獎禮，Emily一直都好有保留，覺得「豬肉味」甚重，但今次《南都》得獎名單都幾有意思，皆因獲頒「年度公民獎」，竟然係「香港菜園村村民」！

稱得為「深港大獎」，得獎者當然唔少得香港，除菜園村村民，得獎港人仲包括設計師陳幼堅、漫畫家小克、歌手黃耀明、記者陳曉蕾等等。

編委﹕港公民意識助升軟實力

正如《南都》編委苟驊頒獎禮上話，「年度公民獎」係整個頒獎禮「最草根獎項」，佢仲話，深圳市民公民意識，因為受到香港影響，所以「覺醒亦比較早」，唔同維權事件已經體現出公民意識，而深圳要與香港融合，亦必須睇到香港法制健全、NGO活躍、公民社會發育成熟等優勢，認為係深圳將來提升「軟實力」最直接借力點，聽起上又真係幾有道理。

菜園村關注組主席高春香當日都有去到深圳出席《南都》頒獎禮，佢同Emily講，好感謝內地傳媒都咁關心香港情，認同菜園村居民抗爭，如果國家同香港政府都係咁睇，佢就心滿意足喇。