Wednesday, September 29, 2010

康文署打壓宗教活動

康文署打壓宗教活動
以政治敏感為由拒借場

2010年09月29日
【本報訊】天主教正義和平委員會上周向康文署申請場地舉行活動,為內地宗教自由祈禱,一切準備就緒,康文署日前突然反口,指活動「政治敏感」,拒絕借出用地,正委會及立法會議員批評該署以行政理由掩飾政治審查。 記者:張嘉雯

正委會聯同多個教會團體計劃下月16日舉行苦路禮儀,為內地失蹤的教會人士、被監視、軟禁及騷擾的教友祈禱,由灣仔駱克道遊樂場出發,前往堅道嘉諾撒聖心商學書院,正委會幹事柯欣欣表示,康文署上周以電話確認預訂,並着該會就活動購買保險,至本周一卻突然以「政治敏感」為由,拒絕該會申請。

「我當時梗係覺得好愕然,因為佢之前仲提我哋買保險嘅,跟住佢就話上面嘅老闆知道單嘢關於宗教自由,覺得政治敏感,所以唔批」。該會即時去信康文署追問原因,不獲回覆。

用行政理由政治審查

本報昨致電康文署查詢,負責的沈姓職員最初回覆時承認,曾「輕輕同佢提過(政治敏感)」的理由,其後又指康樂團體有優先權使用場地,又表示絕非因政治理由拒絕申請。

正委會其後接獲該沈姓職員回覆,質問該會是否有地方不明白,柯欣欣說:「佢問我究竟同《蘋果》記者講咗啲乜嘢,又話唔批係因為康樂活動有優先,又話我哋申請唔夠一個月前,咁點解佢電話覆嗰陣又話可以?我聽到呢樣嘢真係好嬲,唔好講大話,你問心係咪真係呢個原因?」
柯欣欣批評康文署今次純粹出於政治審查,用行政理由作掩飾,有關活動的廣告及宣傳海報已寄出,活動依舊在該處出發,禮儀後舉行聚會,由教區榮休主教陳日君樞機主持。

康文署昨晚 10時再以書面回應本報,並無提及場地是否供其他團體租用作康樂用途,只表示場內只有一個籃球場,「巿民在該時段使用籃球場進行球類活動的需求頗大」,要預留供巿民進行球類活動,並指場地面積有限,不宜舉行 100人以上的集會。

立法會議員李卓人稱,過往多次以該處作為遊行出發點,「佢話畀人打籃球,根本係廢話嚟,好離譜,一國兩制家係咪連宗教自由都無埋?如果家開始連正委會都唔畀,第日連其他人權嘅嘢都唔畀,係好壞嘅先例,未有 23條就用 23條嘅招數」。

康文署拒絕借場時序

9月 20日 正委會以電話查詢駱克道遊樂場在 10月 16日是否空置,康文署回覆可供借用

9月 21日 正委會傳真申請信,同日下午康文署回覆場地無問題,會把正式表格傳予正委會,並着該會為活動購買保險

9月 22日 正委會未有收到康文署表格,致電查詢,電話無人接聽

9月 27日 該會接獲康文署電話,表示因活動政治敏感,場地不獲批准

資料來源:香港天主教正義和平委員會

No comments: