「無家者世界盃」基金會

無家者世界盃
港隊排37勝上屆

【明報專訊】打波總係有贏有輸，輸波唔輸陣先重要。由戒毒者同露宿者組成「港隊」今屆出戰巴西「無家者世界盃」，上周六最後一個比賽日以兩場勝仗畫上圓滿結局。43個國家及地區中，港隊排名37，12戰4勝2和6負，比上屆排第40高3位！

義務領隊何渭枝噚晚接受Emily長途電話訪問時話，對球隊屢敗屢戰積極表現好滿意，比賽過後仲拉大隊去餐廳食飯慶祝，今日就會返香港。

領隊：反敗為勝係學習重點

「學習面對失敗、接受失敗，同埋反敗為勝，係隊員學習重點。」何渭枝話港隊初時輸畀德國同芬蘭隊都幾失落，但檢討過後重新振作，最後一仗對希臘，對方一開始就人盯人，港隊一時唔適應，先輸3粒，但無氣餒，隊員阿山先破蛋，之後大豪完半場前射入遠柱，追番2﹕3，下半場再接再厲，最後贏5﹕4。

研2014年舉辦 需港府支持

何渭枝話，此行另一個任務係同「無家者世界盃」基金會討論2014年香港舉辦比賽可能，「對方認為香港係理想地點，但最重要係有港府支持先至可以成事」。