Green Collar社企

青年創業家廚餘「種」獎
(東方日報) 時下後生仔冇錢創業唔緊要，最緊要係有決心。年紀輕輕嘅鄭營啟喺中大讀完工商管理學位後，冇選擇從商搵真銀，反而走咗去做農夫，搞廚餘回收同有機食物。

鄭營啟嘅概念係將本地廚餘轉化成有機肥料，種出有營養嘅養生沙律及香草，供應畀注重飲食健康嘅管理階層同白領一族。佢嘅努力終於成為青年社企創業者大賞得獎者之一。
去台灣學耕田

話說鄭營啟最初用十萬元成立Green Collar社企，仲專登走去台灣學習耕田方法及技巧。鄭營啟話，屋企人原先唔睇好佢盤生意，仲質疑佢有乜理由要走去做農夫。

雖然遭受連番打擊，但鄭營啟一於好少理，繼續堅持自己嘅決定，好想趁年輕做番啲自己想做嘅嘢。今次得獎，除咗肯定佢嘅工作外，筆獎金仲可以幫佢支付田地及房屋租金。

另外兩位得獎者仲包括咗發明「鑽的」傷殘人士的士嘅梁淑儀，以及成立跨文化教育公司嘅羅偉鴻。佢哋各自獲得十萬蚊嘅獎金，作為繼續推動社會企業嘅資金。