網民集體買免稅煙

網民集體買免稅煙
金牛付稅

【明報專訊】限帶19支免稅煙回港措施8月1日實施之後，部分煙民認為係擾民政策，其中網上電台Our Radio《北上頻道》召集1000個「守法好煙民」今晚齊齊到羅湖，每次過關幫手帶一包煙（19支），寄去指定郵寄地址畀佢，當佢收到一定數量香煙後，馬上安排免費轉贈香港長者煙民。

網上電台召千人 僅20人參與

活動發起人係Our Radio主持傑斯仔同阿靖，活動聯絡人阿Dick同樣係網上電台主持，佢話家過關買煙需要畀「第二十支煙」稅款，即1.2元，非常擾民，所以召集煙民齊齊排隊，各用一張千元金牛交1.2元稅，以示不滿。

「……特區政府想我們屈服，我們偏要團結，發揮真正的獅子山精神！」發起人facebook開設活動簡介，寫出豪情壯語。阿Dick話活動暫時大約有20人，遠低於目標。

海關噚晚話活動未開始，未有正面回應，但重申根據《應課稅品條例》，旅客如攜帶超逾其個人豁免數量的香煙入境，應用紅色通道向海關人員申報，可選擇繳付相關稅款或者放棄超額香煙。